BAKI, AzerVoice
İsrail və Suriya rəsmiləri arasında cümə axşamı Suriyanın cənubundakı gərginliklə bağlı görüş keçiriləcək.
AzerVoice xarici KİV-ə istinadən xəbər verir ki, görüşə ABŞ Prezidenti Donald Trampın Suriya üzrə xüsusi nümayəndəsi və eyni zamanda ABŞ-ın Ankaradakı səfiri Tomas Barrak rəhbərlik edəcək. Görüşə İsrail və Suriyadan yüksək vəzifəli şəxslərin qatılacağı gözlənilir.
Görüşün əsas mövzusu Suriyanın cənubunda təhlükəsizliyi təmin edəcək razılaşmaların müzakirəsi, eləcə də İsrail və Suriya arasında gələcək böhranların qarşısını almaq üçün əlaqə və koordinasiyanın gücləndirilməsi olacaq.
Görüşün harada keçiriləcəyi isə hələlik bəlli deyil.
Qeyd edək ki, iyulun 19-da Tomas Barrak İsrail Baş naziri Netanyahu və Suriya prezidenti Əhməd Əş-Şaraanın ABŞ-ın Dövlət katibi Marko Rubionun dəstəyi ilə atəşkəs barədə razılığa gəldiklərini bildirmişdi. Bu razılaşmanı Türkiyə, İordaniya və digər qonşu ölkələr də dəstəkləyib.