BAKI, AzerVoice

İsrailin Suriyaya hücumları Tramp-Netanyahu münasibətlərində böhrana səbəb olub.

AzerVoice xəbər verir ki, İsrailin Suriyanın cənubundakı Suveyda şəhərinə və digər ərazilərə hücumları Vaşinqtonda narahatlıq yaradıb.

ABŞ rəsmiləri baş nazir Benyamin Netanyahunun “aqressiv və düşünülməmiş” hərəkətlərini tənqid edib, bunun bölgədə sabitliyi pozduğunu bildiriblər.

İsrailin iddiasına görə, hücumlar Druz icmasını qorumaq məqsədilə həyata keçirilib. Lakin ABŞ rəsmiləri bu addımı bölgədəki siyasi balans üçün təhlükəli sayır. ABŞ-ın Türkiyədəki səfiri Tom Barrack İsrail tərəfi ilə diplomatik həll yolları axtarsa da, atəşkəs razılaşmalarına baxmayaraq hücumların davam etməsi Vaşinqtonda məyusluqla qarşılanıb.

ABŞ dövlət katibi Marko Rubio da Netanyahunu açıq şəkildə hücumları dayandırmağa çağırıb.

Belə ki, bəzi mənbələrin məlumatına görə, İsrailin 17 iyulda Qəzzadakı Dini Ailə Kilsəsini vurması isə ABŞ administrasiyasında son mərhələ olub. Trampın özü Netanyahuya zəng edərək , bu barədə izahat tələb edib.

Bundan başqa, ABŞ vətəndaşı olan fələstinli Səif Musalletin israilli radikallar tərəfindən öldürülməsi də bu münasibətlərə əlavə gərginlik gətirib. İsrailin bu addımlarının Trampın Yaxın Şərqdə sülh planlarını pozduğu bildirilir.

ABŞ rəsmiləri Netanyahuya qarşı etimadın azaldığını və onun qərarlarının daxili siyasi ambisiyalarla verildiyini irəli sürüb. Axios nəşrinin məlumatına görə, Netanyahu ilə Tramp arasındakı son görüşlərdə birgə əməkdaşlıq görüntüsü yaradılsa da, Suriya və Qəzzada baş verən son hadisələr münasibətləri ciddi şəkildə sarsıdıb.

Qeyd edək ki, Netanyahu ilə Tramp administrasiyası arasında daha əvvəl də İran və Qəzza məsələsində fikir ayrılıqları yaşanıb. ABŞ rəsmiləri İsrail hökumətindəki radikal sağçı qüvvələrin Trampın sülh səylərini çətinləşdirdiyini vurğulayır.