BAKI, AzerVoice
Netanyahu nümayəndə heyətinə göstəriş verdi - Atəşkəs əldə olunana qədər Dohada qalın.
AzerVoice xəbər verir ki, İsrailin baş naziri Benyamin Netanyahu, Qəzzada atəşkəs razılaşması əldə olunana qədər nümayəndə heyətinin Qətərin paytaxtı Dohada qalmasını tapşırıb.
"Yedioth Ahronot" qəzetinin məlumatına görə, Netanyahu bu qərarı koalisiya tərəfdaşları ilə bölüşüb və danışıqların nəticə verəcəyinə ümid etdiyini bildirib. Hazırda İsrail və HƏMAS nümayəndələrinin dolayı danışıqları davam edir və bəzi əsas mövzularda irəliləyiş olduğu qeyd olunur.
İsrailin dövlət kanalı KAN, vasitəçilərin ordunun Qəzzadan çıxışı ilə bağlı yeni İsrail təklifini HƏMAS-a təqdim etdiyini açıqlayıb. Təklifə görə, Moraq dəhlizindən geri çəkilmə və bufer zonanın daraldılması planlaşdırılır. Lakin tərəflər arasında bəzi fikir ayrılıqları hələ də qalmaqdadır.
Qeyd edək ki, ABŞ prezidenti Donald Tramp İsrailin 60 günlük atəşkəs təklifini qəbul etdiyini bildirib. HƏMAS isə təklifi müsbət dəyərləndirdiyini və danışıqlara hazır olduğunu açıqlayıb.
