BAKI, AzerVoice

UNICEF-in icraçı direktoru Catherine Russell BMT Təhlükəsizlik Şurasına təqdim etdiyi hesabatda Qəzzada davam edən müharibənin uşaqlar üzərində dağıdıcı təsirlərini açıqlayıb.

AzerVoice xəbər verir ki, onun sözlərinə görə, son 21 ayda 17 mindən çox uşaq həlak olub, 33 minə yaxın uşaq isə yaralanıb. Statistikaya əsasən, hər gün təxminən 28 uşaq həyatını itirir.

"Bu uşaqlar döyüşçü deyil, sadəcə yemək və dərman axtarışında öldürülürlər", – deyə Russell vurğulayıb.

İsrail Müdafiə Qüvvələri son hücumların "qanuni" əsaslarla həyata keçirildiyini iddia etsə də, Qəzzanın Deyr əl-Bələh bölgəsində səhiyyə mərkəzi yaxınlığında baş verən hücum nəticəsində azı 10 uşağın həyatını itirdiyi bildirilir. İDF hadisəni “texniki xəta” ilə əlaqələndirib və araşdırmanın davam etdiyini açıqlayıb.

Qeyd edək ki, bölgədə uşaqlar, qadınlar və mülki əhali arasında ölüm halları artmaqda davam edir. Eyni zamanda ərzaq və tibbi ləvazimat çatışmazlığı vəziyyəti daha da ağırlaşdırır. BMT-nin humanitar məsələlər üzrə koordinatoru Tom Fletcher İsraili Cenevrə Konvensiyasına əsasən mühasirədə olan əhaliyə yardım etməyə çağırıb.

Çərşənbə günü Qəzzada ərzaq paylanması zamanı yaranan çaxnaşma nəticəsində isə azı 20 fələstinli həlak olub. Hadisənin yardımın bölüşdürülməsi zamanı yaşanan izdihamla əlaqəli olduğu bildirilir.