BAKI, AzerVoice

Ukrayna Rusiya ilə yeni sülh danışıqlarına hazırdır.

AzerVoice xəbər verir ki, bu barədə Ukraynanın xarici işlər naziri Andrey Sibiqa “Reuters” agentliyinə açıqlamasında bildirib.

“Biz belə danışıqlara istənilən formatda və istənilən məkanda hazırıq” – deyə, o vurğulayıb.

Nazir, həmçinin Rusiya və Ukrayna prezidentləri arasında birbaşa görüşün keçirilməsinə dair çağırış edib. Onun sözlərinə görə, bu cür görüş atəşkəs razılaşmasına nail olmaq üçün ən effektiv addım olacaq.

Bundan əvvəl Rusiya prezidentinin mətbuat katibi Dmitri Peskov bəyan etmişdi ki, Moskva Ukrayna ilə danışıqların yeni raundunun keçirilməsi üçün bütün tərəfləri Kiyevə təzyiq göstərməyə çağırır. O qeyd etmişdi ki, bu kontekstdə əsas vasitəçi qüvvə ABŞ prezidenti Donald Tramp və onun administrasiyası ola bilər.

10 iyul tarixində Kreml nümayəndəsi bildirib ki, Moskva Kiyevdən birbaşa danışıqları davam etdirməyə hazır olub-olmaması ilə bağlı dəqiq siqnal gözləyir. Bu danışıqlar Ukraynadakı münaqişənin tənzimlənməsinə yönəlmiş prosesin bir hissəsi kimi qiymətləndirilir.