BAKI, AzerVoice
ABŞ prezidenti Donald Trampın bu gün açıqlayacağı bəyanatından detallar mətbuata sızıb.
AzerVoice xəbər verir ki, Axios saytının xəbərinə görə, Tramp Ukraynaya uzun mənzilli hücum silahlarının, o cümlədən Moskvaya çata bilən raketlərin göndərilməsi ilə bağlı plan açıqlaya bilər.
Mənbələr bildirir ki, Trampın bəyanatı NATO-nun baş katibi Mark Rutte ilə keçiriləcək görüş zamanı səsləndiriləcək. Həmçinin, Avropa ölkələrindən ABŞ istehsalı silahların xərclərinin ödənilməsi tələb olunacaq. Siyasətçilər bu açıqlamanı Trampın Rusiya prezidenti Vladimir Putinə qarşı artan narazılığının göstəricisi kimi qiymətləndirir.
Planın təməli iyulun əvvəlində keçirilən NATO sammitində Ukrayna prezidenti Vladimir Zelenskinin təklifi əsasında formalaşıb. ABŞ rəsmilərinin məlumatına görə, Tramp və Zelenski arasında sammit zamanı “indiyə qədərki ən yaxşı görüş” baş tutub.
Tramp jurnalistlərə bildirib ki, Ukraynaya Avropa üzərindən “Patriot” sistemləri də daxil olmaqla müxtəlif hərbi texnika göndərilə bilər. Hazırda bəyanatın rəsmi versiyasının təqdim olunması gözlənilir.
Qeyd edək ki, 2024-cü ilin payızında ABŞ prezidenti Co Bayden də Ukraynaya ATACMS raketlərinin verilməsinə icazə vermişdi. Yeni plana daxil olan raketlərin isə Rusiya ərazisinin daha dərinlərinə çatmaq imkanına malik olduğu iddia edilir.
