BAKI, AzerVoice

Birləşmiş Millətlər Təşkilatının (BMT) Fələstin ərazilərində insan hüquqlarının vəziyyəti üzrə xüsusi məruzəçisi Franseska Albanesenin Nobel Sülh Mükafatına namizədliyinin irəli sürülməsi üçün İtaliyada imza toplama kampaniyasına start verilib.

AzerVoice-un məlumatına görə, müvafiq ictimai petisiya change.org portalında yerləşdirilib və üç gün ərzində 8,5 mindən çox imza toplanıb, imza verənlərin sayı isə sürətlə artır.

Xatırladaq ki, daha əvvəl ABŞ Franseska Albaneseyə qarşı sanksiyalar tətbiq etmişdi. Onu Fələstinlə bağlı hesabatları və çağırışlarına görə antisemitizmi yaymaqda və terrorizmi dəstəkləməkdə ittiham edirlər. Bu sanksiyalar birbaşa olaraq ABŞ-ın dövlət katibi Marko Rubio tərəfindən qəbul edilib.

“Franseska Albanese ona həvalə olunmuş mandat çərçivəsində ləyaqət, fədakarlıq və müstəqilliklə fəaliyyət göstərir, Fələstin əhalisinə qarşı hərbi cinayətləri, aparteidi və soyqırımı ifşa edir. Onun fəaliyyəti hüquq və ədalətə əsaslanan sülhün bərqərar olunmasına yönəlmiş konkret addımdır. Biz parlament üzvlərini, dövlət rəsmilərini, institutları və elmi ictimaiyyəti Albanesenin Nobel Sülh Mükafatına namizədliyini rəsmi şəkildə dəstəkləməyə çağırırıq” - deyə, petisiyada qeyd olunub.

Beynəlxalq hüquq üzrə ixtisaslaşmış və 2022-ci ildən BMT-nin xüsusi məruzəçisi olan Franseska Albanese özü bildirib ki, bu müddət ərzində o, BMT üçün altı hesabat hazırlayıb və daim törədilmiş cinayətlərin – qanunsuz həbslər, azyaşlılarla kobud rəftar və soyqırımların araşdırılmasının vacibliyinə diqqət çəkib. O, ictimaiyyət qarşısında İsrail hökumətini humanitar yardımların qarşısını almaqda və Qəzza zolağında elektrik enerjisinin verilməsini dayandırmaqda ittiham edib, Təl-Əvivə silah tədarükünün dayandırılmasına və baş nazir Benyamin Netanyahunun beynəlxalq ədalət qarşısına çıxarılmasına çağırıb.

BMT isə ABŞ-ın Franseska Albaneseyə qarşı tətbiq etdiyi sanksiyaları təhlükəli presedent adlandırıb və qlobal təşkilatın əməkdaşlarına qarşı belə məhdudiyyətlərin qəbuledilməz olduğunu bildirib.