BAKI, AzerVoice
Çinin xarici işlər naziri Van İ ilə ABŞ dövlət katibi Marko Rubionun ASEAN çərçivəsində Kuala Lumpurda keçirilən görüşü müsbət və konstruktiv ab-havada keçib.
AzerVoice xəbər verir ki, bu barədə Çin XİN-in rəsmi saytında məlumat verilib.
“Görüş pozitiv, praqmatik və konstruktiv şəkildə keçib. Tərəflər diplomatik əlaqələrin və dialoqun bütün sahələrdə və səviyyələrdə möhkəmləndirilməsi, xarici işlər orqanlarının ikitərəfli münasibətlərə töhfə verməsi və əməkdaşlıq sahələrinin genişləndirilməsi, eyni zamanda fikir ayrılığı olan sahələrin nəzarətdə saxlanılması üzərində razılığa gəliblər” – deyə, məlumatda qeyd olunub.
Məlumatda həmçinin vurğulanıb ki, nazirlik ABŞ Vaşinqtonun Pekinə rasional və praqmatik yanaşacağına ümid edir:
“Ümid edirik ki, ABŞ tərəfi Çinə obyektiv, rasional və praqmatik yanaşacaq, Çinlə bağlı siyasətini sülh içində birgəyaşayış və qazan-qazan əməkdaşlığı prinsipləri əsasında formalaşdıracaq, Çinlə təmaslarda bərabərlik və qarşılıqlı hörmət prinsiplərinə əməl edəcək”.
Bundan əvvəl, ABŞ Prezidenti Donald Tramp Ağ Evdə nazirlər kabinetinin iclasında bəyan edib ki, son vaxtlar ABŞ ilə Çin arasında münasibətlər yaxşılaşıb və Pekin ticarət sahəsində Vaşinqtona qarşı ədalətli davranır.
