BAKI,
AzerVoice
Tramp və Netanyahu Qəzzanı müzakirə etmək üçün ikinci dəfə
görüşüb.
AzerVoice xəbər verir ki, ABŞ
prezidenti Donald Tramp və İsrailin baş naziri Binyamin Netanyahu
bu həftə ikinci dəfə Qəzza zolağındakı vəziyyəti müzakirə etmək
üçün görüş keçiriblər.
Görüş Oval kabinetdə baş tutub və bağlı qapılar arxasında bir
saatdan çox davam edib.
Netanyahu X sosial şəbəkəsində açıqlamasında, Trampla bu həftə ərzində ikinci dəfə görüşdüyünü təsdiqləyərək, müzakirələrin əsas mövzularının Qəzzada məhbusların azad edilməsi, HƏMAS-ın hərbi və inzibati imkanlarının aradan qaldırılması və İranla bağlı vəziyyət olduğunu bildirib.
Görüşdən əvvəl Qətər rəsmilərindən ibarət nümayəndə heyəti də Ağ Evə gələrək yüksək səviyyəli danışıqlar aparıb. Məlumata görə, Qəzzada atəşkəsə nail olmaq məqsədilə aparılan vasitəçilik səyləri intensivləşib.
Vaşinqton səfəri çərçivəsində Netanyahu ABŞ Konqresinin Nümayəndələr Palatasının spikeri Mayk Consonla da görüşüb. Görüşdən sonra çıxış edən Netanyahu bildirib ki, İsrail vasitəçilərdən gələn atəşkəs təklifini qəbul edib və bu təklif Trampın Yaxın Şərq üzrə xüsusi nümayəndəsi Stiv Vitkoffun ideyalarına uyğun gəlir.
Qeyd edək ki, Vitkoff da əvvəlki açıqlamasında Qəzzada 60 günlük atəşkəs üçün razılaşmanın əldə olunmasına yaxın olduqlarını bildirib və həftənin sonuna qədər konkret nəticələrin olacağına ümid etdiyini vurğulayıb.
