BAKI,
AzerVoice
Qəzzaya hücumları davam etdirməkdə qərarlıyıq.
AzerVoice xəbər verir ki, İsrailin Baş naziri Benyamin Netanyahu Qəzza zolağında davam edən hərbi əməliyyatlarla bağlı açıqlama verərək, atəşkəs danışıqları aparılsa da, hücumları davam etdirməkdə qərarlı olduqlarını bildirib.
Netanyahu X sosial platformasında yayımladığı açıqlamada, Qəzzanın şimalında son qarşıdurmalarda 5 israilli əsgərin həlak olduğunu təsdiqləyib və bu günü "İsrail xalqı üçün ağır gün" kimi qiymətləndirib.
O, İsrailin müharibədəki əsas məqsədlərini bir daha təkrarlayaraq bildirib ki, bu məqsədlərə bütün israilli məhbusların azad olunması, HƏMAS-ın hərbi və inzibati gücünün aradan qaldırılması və Qəzzanın İsrail üçün təhlükə yaratmayan əraziyə çevrilməsi daxildir.
Netanyahu, "HƏMAS-ın artıq mövcud olmayacağına əmin olmalıyıq", – deyə əlavə edib və əməliyyatların hələ başa çatmadığını bildirib.
Xatırladaq ki, Haaretz qəzeti ABŞ prezidenti Donald Trampın Yaxın Şərq üzrə xüsusi nümayəndəsi Stiv Vitkoffun açıqlamasına istinadən yazıb ki, əvvəlki danışıqlarda mövcud olan 4 fikir ayrılığından yalnız biri qalır. Vitkoff bu həftənin sonuna qədər 60 günlük atəşkəs razılaşmasına nail olunacağına ümid etdiyini bildirib.
Qeyd edək ki, İsrail ordusu ötən gün Qəzzada Kfir briqadasının Netzah Yehuda batalyonundan 5 əsgərin həlak olduğunu açıqlayıb. 7 oktyabr 2023-cü ildən bəri İsrailin Qəzzaya hücumlarında bir çox hərbçi həyatını itirib.
