BAKI, AzerVoice

İspaniyalı bir fəal “Madlin” gəmisinin İsrail qüvvələri tərəfindən ələ keçirilməsi səbəbilə İsrailin baş naziri Benyamin Netanyahuya qarşı İspaniya Krallığının Milli Məhkəməsinə şikayət ərizəsi təqdim edib.

AzerVoice xəbər verir ki, bu barədə xarici KİV məlumat yayıb.

Sənəddə qeyd olunub ki, hakim bu məsələ üzrə istintaq aparmaq səlahiyyətinə malik olub-olmadığını dəqiqləşdirmək üçün prokurorluğa müraciət etmək qərarına gəlib. Şikayəti təqdim edən şəxs “Azadlıq Donanması” adlı koalisiyanın üzvü olan ispan vətəndaşı Serxio Toribiodur. Müraciət təkcə Netanyahuya deyil, həmçinin İsrailin müdafiə naziri İsrael Katsa və yəhudi dövlətin digər rəsmilərinə qarşı da yönəlib. İddiaçı bu hərəkətləri insanlığa qarşı cinayət və hərbi cinayətlər kimi qiymətləndirib.

Qeyd edək ki, iyunun 9-na keçən gecə İsrailin “Şayetet-13” adlı dəniz xüsusi təyinatlı qüvvələri “Madlin” gəmisinə nəzarəti ələ keçirib. Gəmi Qəzza sahillərinə doğru irəliləyirdi və göyərtəsində 12 nəfər fəal var idi. Hadisədən sonra gəmi İsrail sahillərinə yönləndirilib və sərnişinlər daha sonra deportasiya olunmaq üçün saxlanılıb.

“Azadlıq Donanması” koalisiyasına daxil olan “Madlin” gəmisi iyunun 1-də Siciliyadan yola düşərək Qəzza əhalisi üçün humanitar yardım aparırdı. Yardıma uşaq qidası, uşaq bezləri, un, düyü, su filtrləri, gigiyena vasitələri və tibbi avadanlıqlar daxil idi. İyunun 8-də müdafiə naziri Katsa ordunun gəmiyə Qəzza sahillərinə yaxınlaşmağa imkan verməmək üçün “istənilən tədbir” görməsi barədə göstəriş vermişdi.

Bu hadisədən sonra İsrailin İspaniyadakı səfirliyinin müvəqqəti işlər vəkili İspaniya Xarici İşlər Nazirliyinə çağırılıb.