BAKI, AzerVoice
Kreml danışıqların üçüncü raunduna işarə edib - Müharibənin bitməsi üçün Rusiyanın təhlükəsizlik tələbləri önə çəkilib.
AzerVoice xəbər verir ki, Rusiyanın
xarici işlər naziri Sergey Lavrov Ukrayna böhranının diplomatik
yollarla həllinə açıq olduqlarını bəyan edərək, davamlı sülh üçün
Rusiyanın təhlükəsizliyinə təhdid yaradan amillərin aradan
qaldırılmasının vacib olduğunu vurğulayıb.
Lavrov Türkiyənin vasitəçiliyi ilə may və iyun aylarında İstanbulda
aparılan birbaşa danışıqları xatırladaraq, üçüncü raundun tarixinin
müəyyənləşmək üzrə olduğunu bildirib.
Lavrov bildirib ki, müvəqqəti atəşkəs yox, daimi sülhə ehtiyac var. Onun sözlərinə görə, Ukraynanın NATO-ya üzv olması ehtimalı və NATO-nun şərqə doğru genişlənməsi Rusiyanın milli təhlükəsizliyi üçün ciddi təhdiddir. Bundan əlavə, Rusiya ilhaq etdiyi Krım, Donetsk, Luqansk, Zaporojye və Xerson bölgələrinin beynəlxalq səviyyədə Rusiya ərazisi kimi tanınmasını, Ukraynanın tərksilahı və neytrallaşmasını, Qərb sanksiyalarının ləğvini və müsadirə edilmiş aktivlərin geri qaytarılmasını tələb edir.
Qeyd edək ki, Lavrov bu açıqlamaları Macarıstanın “Magyar Nemzet” qəzetinə müsahibəsində verib və Budapeştin Ukrayna münaqişəsinə tarazlı yanaşmasını müsbət dəyərləndirib.
