BAKI, AzerVoice, Orxan Qədirzadə

Ukrayna Prezidenti Vladimir Zelenski ölkənin Xarici Kəşfiyyat Xidmətinə (XKX) Rusiya və Çin arasındakı əməkdaşlığı “daha ətraflı” izləmək tapşırığı verib.

AzerVoice xəbər verir ki, bu barədə dövlət başçısı özünün Telegram kanalında məlumat paylaşıb.

Zelenskinin sözlərinə görə, o, Xarici Kəşfiyyat Xidmətinin rəhbəri Oleg İvaşenkodan regional siyasi vəziyyət, Rusiyada gedən proseslər və Moskvanın Çinlə iqtisadi-siyasi əlaqələri barədə məlumat alıb. İfaşenko şirkətlərin və dövlət institutlarının Çin texnologiyalarına, investisiyalarına və iqtisadi prioritetlərinə bağlılığı ilə bağlı məlumat verib.

Zelenski bildirib ki, kəşfiyyat Rusiyanın bəzi resurslara malik ərazilərində Çinə iqtisadi asılılığın artdığını və iki ölkə arasında müxtəlif formatlarda əməkdaşlığın genişləndiyini müşahidə edir. Onun sözlərinə görə, tərəfdaş ölkələrin kəşfiyyat qurumları da bu istiqamətdə bənzər məlumatlara malikdir.

Prezident yazıb ki, Ukraynanın milli maraqları və Avropa ilə Amerika tərəfdaşlarının maraqları baxımından Rusiya–Çin əməkdaşlığına dair bütün aspektlərin daha diqqətlə izlənməsini tapşırıb.

Zelenskinin sözlərinə görə, İvaşenko həm də Ukraynada sabitliyə təsir etmək məqsədilə Rusiya tərəfindən həyata keçirildiyi iddia edilən siyasi kampaniyalar barədə məlumat verib. O bildirib ki, bu fəaliyyətlərin qarşısını almaq üçün tədbirlər görüləcək.

Prezident həmçinin Ukrayna uşaqlarının geri qaytarılması və əsir mübadiləsi ilə bağlı Xarici Kəşfiyyat Xidmətinin fəaliyyətinin davam etdiyini qeyd edib.