BAKI, AzerVoice

Romada yanacaqdoldurma məntəqəsində baş verən hadisədə azı 10 nəfər yaralanıb.

AzerVoice xəbər verir ki, bu gün səhər saatlarında İtaliyanın paytaxtı Romanın şərqində yerləşən Prenestino rayonunda bir yanacaqdoldurma məntəqəsində güclü partlayış baş verib. Hadisə nəticəsində azı 10 nəfərin, o cümlədən yanğınsöndürən və polis əməkdaşlarının yaralandığı bildirilir.

Partlayış Gordiani küçəsində qeydə alınıb. ANSA agentliyi xəbər verir ki, ilk partlayışdan sonra hadisəyə müdaxilə edən yanğınsöndürənlər və ərazidə təhlükəsizlik tədbirləri görən polislər ikinci partlayış nəticəsində xəsarət alıblar. Zərərçəkənlər əsasən şüşə partlaması və yüngül yanıqlarla xəstəxanaya yerləşdirilib.

İtaliyanın yanğınsöndürmə xidmətindən verilən məlumata görə, yanğının söndürülməsi üçün əraziyə 10 komanda cəlb olunub. Partlayışın gücü ətrafdakı binaların şüşələrini sındırıb, qara tüstü isə şəhərin bir çox hissəsindən görünməkdədir. Yaxınlıqdakı yaşayış binaları təhlükəsizlik məqsədilə təxliyə olunub, metroda C xətti üzrə xidmətlər müvəqqəti dayandırılıb.

İtaliyanın baş naziri Giorgia Meloni hadisə ilə bağlı “X” hesabında paylaşım edərək vəziyyəti yaxından izlədiyini bildirib, Roma meri və səlahiyyətli şəxslərlə daimi əlaqədə olduğunu qeyd edib və yaralılara şəfa diləyib.