BAKI,
AzerVoice
Qəzzada atəşkəs 7 iyulda elan edilə bilər.
AzerVoice xəbər verir ki, İsrail
mətbuatının məlumatına görə, ABŞ prezidenti Donald Tramp və
İsrailin baş naziri Benyamin Netanyahu arasında iyulun 7-də
keçiriləcək görüş zamanı Qəzza zolağında müvəqqəti atəşkəsin elan
olunacağı gözlənilir.
Atəşkəslə bağlı razılaşmanın əldə olunması və HƏMAS ilə məhbus
mübadiləsi planının da müzakirə ediləcəyi bildirilir.
İsrailin "Yedioth Ahronoth" nəşri yazır ki, ABŞ və İsrail rəsmiləri arasında intensiv danışıqlardan sonra 60 günlük atəşkəs üçün ilkin razılıq əldə olunub. Prezident Tramp İsrailin təklif olunan şərtləri qəbul etdiyini bildirib və atəşkəs dövründə müharibəyə son qoymaq üçün səylərin davam edəcəyini vurğulayıb.
Eyni zamanda, Qətər və Misirin vasitəçiliyi ilə HƏMAS-a “son təklifin” təqdim ediləcəyi, təşkilatın isə atəşkəsə müsbət yanaşdığı bildirilir. Fələstin mənbələri HƏMAS-ın danışıqlara açıq olduğunu və bəzi çətinliklərə baxmayaraq irəliləyiş əldə oluna biləcəyini istisna etmirlər.
Qeyd edək ki, razılaşmanın əldə olunması HƏMAS-ın cavabından asılı olacaq. İsrail tərəfi isə razılığın əldə olunacağı halda danışıqlara başlamağa hazır olduğunu bəyan edib.
