BAKI, AzerVoice

Trampdan HƏMAS-a atəşkəs xəbərdarlığı- Vəziyyət daha da pisləşəcək.

AzerVoice xəbər verir ki, ABŞ prezidenti Donald Tramp İsrailin Qəzza zolağında 60 günlük atəşkəs şərtlərini qəbul etdiyini açıqlayıb.

Lakin HƏMAS-ın hələlik bu təklifə cavab vermədiyini bildirən Tramp, razılaşmanın qəbul edilməsinin vacib olduğunu, əks halda vəziyyətin daha da ağırlaşacağını xəbərdar edib.

Tramp Truth Social platformasındakı paylaşımında nümayəndələrinin İsrail rəsmiləri ilə “uzun və məhsuldar” görüş keçirdiyini, atəşkəs müddətində müharibənin sona çatdırılması üçün bütün tərəflərlə əməkdaşlıq ediləcəyini vurğulayıb. O, atəşkəs danışıqlarında vasitəçi olan Qətər və Misirin HƏMAS-a “son təklif” verəcəyini bildirib.

Eyni zamanda, Qəzzadakı vəziyyətin kritik olduğu, xüsusən Şifa xəstəxanasının direktoru Məhəmməd Əbu Silmiyyenin elektrik enerjisinin kəsilməsinin xəstəxanaların fəaliyyətini dayandıraraq insan itkilərinə səbəb ola biləcəyini xəbərdar etməsi diqqət çəkir.

Belə ki, ABŞ-ın İsraildə ifrat sağçıların mövqeyini yumşaltmaq üçün atəşkəs müqabilində Təl-Əvivə regional siyasi güzəştlər təqdim edəcəyi iddiaları yayılır. Haaretz qəzetinin mənbələrinə görə, ABŞ İsrailə Suriyada bəzi mövqelərdən çəkilməyi, xüsusilə Qolanın şərq yamaclarından uzaqlaşmağı təklif edib. Ancaq Hermon dağından çəkilmək məsələsi hələ razılaşdırılmayıb.

Səudiyyə Ərəbistanının hələlik İsraillə normallaşma prosesinə qatılmaq istəmədiyi, amma atəşkəsin həm Tramp, həm də Netanyahu üçün siyasi fayda təmin edə biləcəyi bildirilir.

Qeyd edək ki,İsrail baş naziri Netanyahu gələn həftə ABŞ-a səfər edərək Tramp və digər yüksək vəzifəli rəsmilərlə, o cümlədən vitse-prezident J.D.Vens, dövlət katibi Marko Rubio, müdafiə naziri Pit Heqset, Trampın Yaxın Şərq üzrə xüsusi nümayəndəsi Stiv Vitkoff və ticarət naziri Hovard Lutniklə görüşəcək.Onlar ticarət razılaşmaları və təhlükəsizlik məsələlərini müzakirə edəcək, həmçinin Konqres liderləri ilə danışıqlar aparacaqlar.