BAKI, AzerVoice
Tanzaniyada iki avtobus toqquşub.
AzerVoice xəbər verir ki, bu barədə Sinxua agentliyi Kilimanjaro vilayətinin komissarı Nurdin Babuya istinadən məlumat yayıb.
Məlumata görə, hadisə nəticəsində azı 38 nəfər həlak olub, 28 nəfər isə xəsarət alıb.
Hadisə ötən gün axşam saatlarında Moşi şəhəri yaxınlığında baş verib. Komissarın sözlərinə görə, avtobuslardan birinin təkəri partlayıb və sürücü idarəetməni itirərək qarşıdan gələn digər avtobusla toqquşub. Nəticədə hər iki nəqliyyat vasitəsi yanıb.
Komissar qeyd edib ki, yaralanan 28 nəfərdən 22-si ilkin tibbi yardımdan sonra xəstəxanadan buraxılıb. Qalan 6 nəfərin müalicəsi isə həkim nəzarəti altında davam edir.