BAKI, AzerVoice
ABŞ Prezidenti Donald Tramp Kanadayla ticarət danışıqlarını dərhal dayandırdığını bəyan edib.
AzerVoice xəbər verir ki, Trampın sözlərinə görə, bu qərar Ottavanın böyük texnologiya şirkətlərinə yönəlik yeni vergi siyasətini tətbiq etməyə hazırlaşması fonunda qəbul edilib.
Prezident bu qərarı cümə günü sosial şəbəkələrdə açıqlayaraq, yaxın 7 gün ərzində Kanadaya qarşı yeni gömrük tariflərinin tətbiq ediləcəyini bildirib.
“Biz bu andan etibarən Kanada ilə aparılan bütün ticarət danışıqlarını dayandırırıq,” – deyə Tramp vurğulayıb.
Kanadanın ötən ildən qüvvəyə minmiş 3 faizlik rəqəmsal xidmət vergisi ABŞ-la münasibətlərdə əsas mübahisə predmeti olaraq qalır. Vergi əsasən Amazon, Apple və Google kimi amerikalı texnologiya nəhənglərinə tətbiq olunacaq. İş dünyasının hesablamalarına görə, bu vergi ABŞ şirkətlərinə illik 2 milyard dollardan çox zərər vura bilər.
Kanadalı rəsmilər məsələnin ABŞ-la aparılan ticarət danışıqları çərçivəsində həll ediləcəyinə ümid edirdilər. Yeni seçilmiş Baş nazir Mark Karni də əvvəlki aylarda Trampla münasibətlərin müsbət yöndə irəlilədiyini bildirib.
Bununla belə, Trampın sərt bəyanatına cavab olaraq Kanadanın Baş naziri Mark Karni açıqlama verib.
“Biz bu mürəkkəb danışıqları kanadalıların maraqlarına uyğun şəkildə davam etdirəcəyik”- deyə o bildirib.
Karni, həmçinin, Kanadanın ABŞ-la münasibətlərini “öz şərtləri ilə” qurmağa çalışacağını vurğulayıb.
ABŞ uzun illərdir Kanadanın ən böyük ticarət tərəfdaşıdır. 2023-cü ildə ABŞ Kanadadan 400 milyard dollardan çox dəyərində məhsul idxal edib. Lakin Tramp bu ilin əvvəlində sərhəddə narkotik qaçaqmalçılığı təhlükəsinə istinad edərək Kanadaya 25 faizlik yeni gömrük rüsumları tətbiq edib.
