BAKI,AzerVoice
Ukrayna Prezidenti Volodimir Zelenski Danimarkanın Ukrayna ilə birgə uzaqmənzilli pilotsuz uçuş aparatları (PUA) və raketlər istehsal edəcək ilk ölkə olacağını açıqlayıb.
AzerVoice xəbər verir ki, bu barədə o, Danimarkanın Baş naziri Mette Frederiksenlə görüşdən sonra danışıb.
Zelenskinin sözlərinə görə, hərbi texnika istehsalı Ukrayna ərazisindən kənarda həyata keçiriləcək. Kopenhagen, eyni zamanda, uzaqmənzilli PUA istehsalı üçün 1,26 milyard avro ayırmağa razılaşıb.
Görüş zamanı tərəflər həmçinin müdafiə sahəsində əməkdaşlığın dərinləşdirilməsi və silah istehsalının hər iki ölkədə təşkil olunması məsələlərini müzakirə ediblər.
“Danimarka, Ukrayna ilə birlikdə uzaqmənzilli pilotsuz uçuş aparatları və raketlərin ölkə xaricində istehsalına başlayacağımız ilk ölkə olacaq” – deyə Zelenski bildirib.
Qeyd edək ki, Zelenski daha əvvəl Ukraynanın ildə 8 milyon dron istehsal etmək potensialına malik olduğunu, lakin bunun üçün kifayət qədər maliyyə vəsaitinin olmadığını bildirib.
