BAKI, AzerVoice
Aİ rəhbərindən İranla bağlı çağırış- Atəşkəsi fürsətə çevirin, diplomatiyaya qoşulun.
AzerVoice xəbər verir ki, Avropa İttifaqı Komissiyasının sədri Ursula fon der Leyen ABŞ prezidenti Donald Trampın elan etdiyi İsrail-İran atəşkəsini alqışlayıb və İranı diplomatik prosesə aktiv şəkildə qoşulmağa çağırıb.
“Avropa Prezident Trampın atəşkəs elanını alqışlayır. Bu, gərginlik içində olan regionda sabitliyin bərpası üçün mühüm addımdır və bu, bizim ümumi prioritetimiz olmalıdır”- deyə Fon der Leyen sosial media hesabında etdiyi paylaşımda bildirib.
Aİ rəhbəri böhranın yalnız danışıqlar yolu ilə həll oluna biləcəyini vurğulayaraq, “İranı etibarlı diplomatik prosesdə ciddi iştirak etməyə çağırırıq”- deyə bildirib.
Qeyd edək ki, iyunun 13-də İsrail İranın müxtəlif şəhərlərindəki nüvə obyektlərinə və ordu rəhbərliyinə qarşı genişmiqyaslı hücumlara başlayıb. Nəticədə İran Silahlı Qüvvələrinin Baş Qərargah rəisi, SEPAH komandanları və 9 nüvə alimi həlak olub.
İranın Səhiyyə Nazirliyi iyunun 21-də hücumlar nəticəsində 430 mülki vətəndaşın həlak olduğunu, 3500-dən çox insanın yaralandığını açıqlayıb. İsrail tərəfi isə İranın cavab hücumlarında 28 nəfərin öldüyünü, 1272 nəfərin yaralandığını bildirib.
Bölgədəki gərginliyin artmasına başda Türkiyə olmaqla bir çox ölkə reaksiya verib və İsraili qınayıb. ABŞ isə iyunun 22-də İrandakı üç nüvə obyektini hədəfə alıb. Gecə saatlarında ABŞ prezidenti Tramp atəşkəsin əldə olunduğunu açıqlayıb.
