BAKI, AzerVoice

ABŞ Prezidenti Donald Tramp Yaxın Şərqdə ABŞ-ın hərbi müdaxiləsinin daha da genişlənməsini istəmir.

AzerVoice xəbər verir ki, bu barədə CNN telekanalı Ağ Evdəki adının açıqlanmasını istəməyən rəsmiyə istinadla məlumat yayıb.

Məlumatda bildirilib ki, Tramp, buna baxmayaraq, zəruri olacağı təqdirdə qarşıdurmanın eskalasiyasına da hazırdır. Rəsmilərin bildirdiyinə görə, Vaşinqton İranın ABŞ-ın zərbələriə cavab verəcəyini əvvəlcədən gözləyib.

"Biz onların cavab verəcəyini bilirdik. Onların reaksiyası 2020-ci ildə general Qasım Süleymaninin öldürülməsindən sonra baş verən hadisələrə bənzəyirdi" – deyə, rəsmidən sitat gətirilib.

Xatırladaq ki, 2020-ci ildə Trampın göstərişi ilə İran İnqilab Keşikçiləri Korpusunun yüksək rütbəli komandiri Qasım Süleymani Bağdad hava limanında dron hücumu ilə öldürülmüşdü. Beş gün sonra İran bu qətlin cavabı olaraq İraqdakı iki ABŞ hərbi bazasına raket zərbələri endirmişdi və bu, ABŞ-İran qarşıdurmasında yeni gərginlik mərhələsinə səbəb olmuşdu.

Qeyd edək ki, bu gün axşam saatlarında İran ABŞ-ın Qətərdə yerləşən bazalarına qarşı "Qələbə müjdəsi" adlı yeni hərbi əmliyyata başlayıb. İran ABŞ-ın Qətərdəki Əl-Udeid hərbi bazasına altı raket zərbəsi endirib.