BAKI,AzerVoice

Yaponiya Baş naziri Sanai Takaiçi dövlət sektorunda çalışan məmurların maaşları ilə bağlı qanuna yenidən baxaraq, özünün və bütün kabinet üzvlərinin maaşlarının azaldılmasını planlaşdırır. Qanun dəyişiklikləri parlamentin hazırkı fövqəladə sessiyası çərçivəsində müzakirə ediləcək.

AzerVoice xəbər verir ki, Yaponiyanın Jiji Press agentliyinin məlumatına görə, hökumət çərşənbə axşamı məsul nazirlərin iştirakı ilə toplantı keçirəcək və Baş nazir ilə nazirlərin maaşlarını deputatların maaşından yüksək edən əlavə müavinətlərin dayandırılması qərarını rəsmiləşdirəcək.

Takaiçi bu addımla uzun müddətdir müdafiə etdiyi “nazir maaşlarının azaldılması” təklifinin icrası ilə islahatlara sadiqliyini nümayiş etdirmək niyyətindədir.

Hökumətdə koalisiya ortağı olan “Yaponiya İnnovasiya Partiyası” (Nippon Ishin no Kai) deputatların imtiyazlarının azaldılmasına yönəlik geniş islahatları dəstəkləyir.

Baş nazir oktyabr ayında keçirilən ilk mətbuat konfransında belə demişdi: “Qanuna elə dəyişiklik ediləcək ki, Nazirlər Kabinetinin üzvləri deputatlardan daha yüksək maaş almasın.”

Hökumət qanuna “Baş nazirə və nazirlərə əlavə müavinətlərin hazırda verilməməsi” barədə müddəa əlavə etmə imkanını nəzərdən keçirir.