BAKI,AzerVoice
İsrail və İran arasında altı gündür davam edən hava müharibəsi çərşənbə günü yeni raket hücumları ilə davam edib.
AzerVoice xəbər verir ki, ABŞ prezidenti Donald Tramp isə Tehranın "qeydsiz-şərtsiz təslim" olmasını tələb edərək regiondakı gərginliyə sərt reaksiya verib.
İsrail ordusu çərşənbə günü səhər saatlarında İranın Tel-Əviv istiqamətində iki raket zərbəsi endirdiyini açıqlayıb. İsrail Hərbi Hava Qüvvələri Tehranın cənub-qərbində yerləşən hərbi obyektlərə zərbə endirmək üçün sakinlərə təxliyə çağırışı edib.
İran mediası İsrailin SEPAH-a bağlı universitetə, paytaxt yaxınlığındakı Xocir ballistik raket bazasına və digər strateji obyektlərə hava hücumları təşkil etdiyini bildirib.
Donald Tramp sosial şəbəkədə paylaşdığı mesajda Ayətullah Əli Xameneinin yerini bildiklərini yazıb və “hələlik öldürməyəcəyik… səbirimiz azalır” deyə xəbərdarlıq edib.
Bundan cəmi üç dəqiqə sonra isə "UNCONDITIONAL SURRENDER!" – "QEYDSİZ-ŞƏRTSİZ TƏSLİM!" paylaşımı ilə İranı açıq şəkildə təslim olmağa çağırıb.
Ağ Ev rəsmiləri Trampın İsrailin baş naziri Netanyahu ilə telefon danışığı apardığını və ABŞ Milli Təhlükəsizlik Şurası ilə fövqəladə iclas keçirdiyini açıqlayıblar.
Pentaqon rəsmiləri ABŞ-ın bölgəyə əlavə qırıcı təyyarələr göndərdiyini və mövcud hərbi hava qüvvələrinin bölgədə qalma müddətinin uzadıldığını bildiriblər. ABŞ hələlik birbaşa müharibəyə daxil olmasa da, İsrailə atılan raketlərin vurulmasına yardım edir.
İsrail isə açıqlamasında İran hava məkanına nəzarəti ələ keçirdiyini və hücumların daha da gücləndiriləcəyini bildirib. Lakin strateji obyektlərin – xüsusilə də Fordo kimi dərin yeraltı nüvə obyektlərinin – sıradan çıxarılması üçün ABŞ-ın birbaşa iştirakı tələb olunur.
İsrail hücumları nəticəsində Ayətullah Xameneinin əsas hərbi və təhlükəsizlik müşavirlərinin öldüyü bildirilir. İranın kiberkomandanlığı rabitə cihazlarından istifadəyə qadağa qoyub. İran mediası İsrailin ölkənin rəqəmsal infrastrukturuna qarşı “kütləvi kiberhücum” başlatdığını xəbər verir.
İsrail, İranın nüvə silahı hazırlamaq üzrə olduğunu iddia edərək hava hücumlarına start verib. Tehran isə nüvə texnologiyasını yalnız sülh məqsədləri üçün istifadə etdiyini bildirir. Beynəlxalq Atom Enerjisi Agentliyi isə Natanz nüvə kompleksinin yeraltı bölməsinin İsrail zərbələri ilə vurulduğunu təsdiqləyib.
İran rəsmiləri 224 nəfərin, əsasən mülki şəxslərin öldüyünü açıqlayıb. İsrail isə 24 mülki vətəndaşın həyatını itirdiyini bildirib. Hər iki ölkədə minlərlə insan evakuasiya edilib.
Dünyanın ən böyük qaz yataqlarından biri olan İran-Qətər sərhədindəki South Pars kompleksinin də zərbəyə məruz qalması enerji bazarlarında ciddi narahatlıq yaradıb.
