BAKI, AzerVoice
ABŞ Prezidenti Donald Tramp bildirib ki, İran hakimiyyətindən nümayəndələr ona zəng edərək Tehranın nüvə proqramı üzrə razılaşma imzalamaq istədiklərini bildiriblər.
AzerVoice xəbər verir ki, bu barədə o "NBC News" telekanalına verdiyi açıqlamada deyib.
“Onlar əvvəl razılaşma fürsətini əldən verdilər. İndi, bəlkə də, yeni bir imkanları olacaq. Baxarıq”- deyə, D.Tramp qeyd edib.
"İran nümayəndələri mənə zəng edərək bu barədə danışmaq istədiklərini bildirirlər. Onlar mənə zəng edirlər ki, razılaşma barədə danışaq” - deyə, o əlavə edib.
Xatırladaq ki, İsral Hərbi Hava Qüvvələri bugün səhər saatlarında İran ərazisinə hava zərbələri endiriblər. Zərbələr nəticəsində çoxlu sayda yüksək səviyyəli hərbçi, o cümlədən İran Silahlı Qüvvələri Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər ölüb. İran BMT Təhlükəsizlik Şurasının hadisə ilə əlaqədar fövqəladə iclas keçirməsini istəyib. Eyni zamanda İran tərəfi İsrailə cavab hücumunun həyata keçiriləcəyini bildirir.
