BAKI, AzerVoice

Putin tamamilə dəli olub, bütün Ukraynanı istəyir.

AzerVoice xəbər verir ki, ABŞ prezidenti Donald Tramp Rusiya prezidenti Vladimir Putinin Ukraynaya son hücumlarından sonra onu sərt tənqid edərək, “o tamamilə dəli olub” ifadəsini işlədib.

Tramp bu fikirləri “Truth Social” hesabında paylaşdığı açıqlamada bildirib. O, Rusiya prezidenti ilə əvvəllər yaxşı münasibətlərə malik olduğunu, lakin Putinin Ukraynada səbəbsiz yerə çox sayda insanın ölümünə səbəb olduğunu qeyd edib.

“Putin Ukraynanın yalnız bir hissəsini deyil, bütününü istəyir. Əgər bunu edərsə, bu, Rusiyanın dağılmasına səbəb olacaq”, – deyə Tramp bildirib.

Prezident Ukrayna lideri Volodimir Zelenskini də tənqid edib. “Zelenski bu cür danışmaqla ölkəsinə heç bir fayda vermir. Onun dedikləri problem yaradır, xoşuma gəlmir”- deyə o qeyd edib.

Tramp, əgər özü hakimiyyətdə olsaydı, bu müharibənin başlamayacağını qeyd edərək, “Bu, Zelenski, Putin və Baydenin müharibəsidir. Mən isə yalnız bu bacarıqsızlıq və nifrətlə alovlanan böyük və çirkin yanğınları söndürməyə kömək edirəm”, – deyə vurğulayıb.

Digər tərəfdən, Ukrayna prezidenti Zelenski Rusiya ordusunun son hücumlarında 70-ə yaxın raket və 300-ə yaxın pilotsuz uçuş aparatından istifadə etdiyini açıqlayıb və beynəlxalq ictimaiyyəti səssiz qalmamağa çağırıb.

Qeyd edək ki, Ukraynanın daxili işlər naziri İqor Klimenko həmin hücumlarda 12 nəfərin həlak olduğunu, 60-dan çox insanın isə yaralandığını bildirib.