BAKI, AzerVoice
ABŞ-da Prezident Donald Trampın qərarlarını bloklayan federal hakimlər onun tərəfdarlarından çoxsaylı təhdidlər almağa başlayıblar və təhlükəsizlik xidmətlərinə özlərinin rəhbərlik etmək istədiklərini bildirirlər.
AzerVoice xəbər verir ki, bu barədə The Wall Street Journal qəzeti məlumat yayıb.
Məlumata görə, mart ayında Vaşinqtonda keçirilən qapalı iclasda təxminən 50 hakim Tramp administrasiyasının siyasətinə zidd qərar verdiklərinə görə qarşılaşdıqları təhdidləri müzakirə ediblər. Onlarla hakim və onların ailə üzvləri təhdid məktubları və partlayıcı maddə barədə yalan məlumatlar alıblar. Hətta Trampın doğuşla vətəndaşlıq hüququnu ləğv edən sərəncamını bloklayan hakimin evinə naməlum şəxslər polis xüsusi təyinatlılarını (SWAT) çağırıblar.
ABŞ Ali Məhkəməsinin öz müstəqil təhlükəsizlik xidməti var, digər federal hakimlərin təhlükəsizliyinə isə Ədliyyə Nazirliyinə tabe olan Marşallar Xidməti cavabdehdir. Lakin bəzi hakimlər Trampa tabe olan Ədliyyə Nazirliyinin onların təhlükəsizlik xidmətini ləğv edə biləcəyindən ehtiyat edirlər, çünki verdikləri qərarlarla Trampın siyasətinə maneə törətdikləri düşünülür.
Demokrat qanunvericilər ABŞ Konqresində bir qanun layihəsini irəli sürməyi planlaşdırırlar. Bu layihə hakimlərə Marşallar Xidmətinin rəhbərini özləri təyin etməyə və təhlükəsizliklərini müstəqil şəkildə idarə etməyə imkan verəcək.
