BAKI, AzerVoice

Avstraliyanın şərq sahillərində yağan leysan yağışlar nəticəsində baş verən genişmiqyaslı daşqınlar və çayların daşması səbəbilə azı 32 min nəfər təcrid vəziyyətində qalır.

AzerVoice xəbər verir ki, bu barədə Yeni Cənubi Uels ştatının Fövqəladə Hallar Xidməti (SES NSW) X sosial şəbəkəsində məlumat yayıb.

“Yavaş-yavaş aşağı enən daşqın suları səbəbilə ştatın şimal sahilində təxminən 32 min sakin hələ də təcrid olunmuş vəziyyətdədir. Fövqəladə Hallar Xidməti bu bölgələrdə ərzaq ehtiyatlarının doldurulmasına diqqət göstərəcək və həmin ərazilərə çıxış bərpa olunana qədər bu işlər davam etdiriləcək” – deyə, qurum bildirib.

Qeyd edilib ki, 14 şəhər və yaşayış məntəqəsi tamamilə blokadadadır.

Əhaliyə yardım və daşqınların nəticələrinin aradan qaldırılması üçün ölkənin digər bölgələrindən fövqəladə yardım qüvvələri səfərbər edilib.

“Qvineya, Qərbi Avstraliya, Viktoriya, Cənubi Avstraliya, Tasmaniya və Avstraliya Paytaxt Ərazisindən təxminən 200 fövqəladə xidmət əməkdaşı səfərbər olunub. Onlar sualtı xilasetmə işlərinin və fırtına, daşqın nəticələrinin aradan qaldırılması üzrə qrupların işini əlaqələndirəcək” - deyə, məlumatda bildirilib.

Qeyd edək ki, 15–23 may tarixlərində şərq sahillərinə yağan intensiv yağışlar nəticəsində 150-dən çox yaşayış məntəqəsi daşqın zonasında qalıb, minlərlə insan evlərini tərk edərək qohumlarının yanına və ya xüsusi təxliyə məntəqələrinə sığınıb.

Avstraliya Dövlət Meteorologiya Bürosunun məlumatına əsasən, bu müddət ərzində ölkənin şərqində yerləşən bəzi bölgələrə 600 mm-dən çox yağıntı düşüb. Nəticədə 50 mindən çox insan təcrid vəziyyətinə düşüb, 7 min evdə elektrik enerjisi kəsilib, 10 mindən çox daşınmaz əmlak obyektinə ciddi ziyan dəyib və ya onlar tamamilə məhv olub.