BAKI, AzerVoice

Avropa İttifaqı (Aİ) Komissiyasının ticarət üzrə məsul üzvü Maros Şefçoviç, Avropa İttifaqı ilə Amerika Birləşmiş Ştatları (ABŞ) arasında aparılan ticarət danışıqlarının təhdidlərə deyil, qarşılıqlı hörmətə əsaslanmalı olduğunu bildirib.

AzerVoice xəbər verir ki, ABŞ Prezidenti Donald Trampın Avropa İttifaqına qarşı 50 faiz tarif tətbiqini təklif etməsindən sonra açıqlama yayan Šefčovič, sosial media hesabında bu məsələyə münasibət bildirib. O, ABŞ Ticarət naziri Hovard Lutnik və Ticarət nümayəndəsi Cemison Qrir ilə görüş keçirdiyini qeyd edib.

“Avropa İttifaqı hər iki tərəfin maraqlarına xidmət edən bir ticarət razılaşması əldə etməkdə qərarlıdır. Aİ-ABŞ ticarət əlaqələri unikal xarakter daşıyır və təhdidlər deyil, qarşılıqlı hörmətlə yönləndirilməlidir,” – deyə o bildirib.

Şefçoviç, Avropa Komissiyasının danışıqlarda xoşniyyətli şəkildə iştirak etməyə hazır olduğunu və "maraqlarını qorumağa da tam hazır olduğunu" vurğulayıb.

ABŞ Prezidenti Tramp isə "Truth Social" platformasında paylaşdığı açıqlamada, Aİ ilə aparılan ticarət danışıqlarının nəticə vermədiyini ifadə edərək, 1 iyundan etibarən Avropa İttifaqından gətirilən məhsullara 50 faiz birbaşa tarif tətbiqini təklif etdiyini bildirib. Tramp qeyd edib ki, məhsul ABŞ-da istehsal olunubsa, bu tarif tətbiq edilməyəcək.

Bundan əlavə, ABŞ Maliyyə naziri Skott Bessent, Trampın Aİ-nin təkliflərini digər əsas ticarət tərəfdaşlarının təklifləri ilə müqayisədə “keyfiyyət baxımından geri qaldığını” düşündüyünü və tətbiq edilən tarif təkliflərinin Avropa İttifaqını hərəkətə keçirməsini ümid etdiyini bildirib.