BAKI, AzerVoice

Ukrayna ilə növbəti danışıqların yeri hər iki tərəfin razılığı ilə müəyyən olunacaq.

AzerVoice xəbər verir ki, Kremlin sözçüsü Dmitri Peskov Ukrayna ilə keçiriləcək növbəti danışıqların məkanı ilə bağlı yekun qərarın hələ verilmədiyini və bu qərarın yalnız qarşılıqlı razılıq əsasında qəbul edilə biləcəyini bildirib.

Peskov paytaxt Moskvada keçirdiyi mətbuat konfransında jurnalistlərin suallarını cavablandırıb. O, Ukraynanın son günlərdə Rusiyaya, xüsusən də Moskvaya qarşı pilotsuz uçuş aparatları ilə həyata keçirdiyi hücumlara toxunaraq, bu hücumları “Kiyev rejiminin davam edən düşmənçilik fəaliyyəti” kimi qiymətləndirib.

Kreml sözçüsü Rusiyanın hava hücumundan müdafiə sistemlərinin bu hücumları uğurla dəf etdiyini qeyd edib.

Ukrayna ilə danışıqların davam etdirilməsi məsələsinə toxunan Peskov, “Növbəti danışıqların harada keçiriləcəyi barədə hələ heç bir razılaşma yoxdur. Belə bir qərar yalnız hər iki tərəfin razılığı ilə mümkündür və bu barədə müvafiq vaxtda qərar veriləcək”- deyə bildirib.

Qeyd edək ki, Rusiya və Ukrayna nümayəndə heyətləri sonuncu dəfə mayın 16-da İstanbulda, Dolmabahçe Rəyasət Heyətinin binasında görüşüblər. Türkiyə tərəfi həmin görüşdə tərəflər arasında məhbus mübadiləsinə dair razılaşmanın əldə olunmasında vasitəçi rolunu oynayıb.