BAKI, AzerVoice

Türkiyə Prezidenti Rəcəb Tayyib Ərdoğan, İspaniya Baş naziri Pedro Sançesi qəbul edib.

AzerVoice xəbər verir ki, görüş Dolmabağça İş Ofisində mətbuata qapalı şəkildə keçirilib.

Görüşdə Türkiyənin xarici işlər naziri Hakan Fidan, Prezident Administrasiyasının Kommunikasiya rəhbəri Fahrettin Altun və Prezidentin xarici siyasət və təhlükəsizlik üzrə baş müşaviri Akif Çağatay Kılıç da iştirak ediblər.

Görüşdə Türkiyə-İspaniya ikitərəfli münasibətləri, regional və qlobal məsələlər müzakirə olunub.

Ərdoğan, Türkiyə ilə İspaniya arasında ticarət həcminin artırılması istiqamətində işlərin davam etdirildiyini bildirib və iki ölkənin xüsusilə müdafiə sənayesi və nəqliyyat sahələrində əməkdaşlığı daha da inkişaf etdirmək üçün səylərini davam etdirəcəyini vurğulayıb.

Ərdoğan, İspaniyanın İsrailin Qəzzadakı soyqırımına qarşı nümayiş etdirdiyi qətiyyətli mövqeyini alqışlayıb. O qeyd edib ki, Türkiyənin əsas prioriteti Qəzzaya humanitar yardımların çatdırılmasıdır və ortaq səylər nəticəsində Fələstindəki zülmün sona çatacağına inanır.

Ukrayna ilə Rusiya arasında müharibənin başa çatması üçün Türkiyənin səylərini davam etdirdiyini vurğulayan Ərdoğan, İstanbulda keçirilmiş danışıqlarda əsir mübadiləsi kimi məsələlərin vacib addım olduğunu qeyd edib və bu müharibənin bitməsi üçün yaranmış fürsətin əldən qaçırılmaması gərəkdiyini bildirib.