BAKI, _^AzerVoice

Avropa İttifaqına 50 faiz gömrük rüsumu tətbiq edilə bilər.

_^AzerVoice xəbər verir ki, ABŞ prezidenti Donald Tramp Avropa İttifaqı ilə ticarət danışıqlarının nəticə vermədiyini əsas gətirərək, iyunun 1-dən etibarən Aİ-yə qarşı 50 faizlik gömrük rüsumunun tətbiqini təklif edib.

Donald Tramp bu barədə “Truth Social” platformasında paylaşım edərək Avropa İttifaqı ilə ticarət münasibətlərini sərt şəkildə tənqid edib. O, Aİ-ni ABŞ-a qarşı “ədalətsiz və birtərəfli ticarət siyasəti” yürütməkdə ittiham edib.

“Avropa İttifaqı ticarət maneələri, yüksək ƏDV vergiləri, korporativ cərimələr, qeyri-maliyyə ticarət maneələri, valyuta manipulyasiyası və Amerika şirkətlərinə qarşı əsassız məhkəmə iddiaları ilə ABŞ-ın illik 250 milyard dollardan artıq ticarət kəsiri verməsinə səbəb olur. Bu qəbuledilməzdir,” – deyə Tramp bildirib.

Danışıqların nəticəsiz qalmasından narazı qalan Tramp, 1 iyundan Aİ-yə birbaşa 50 faizlik gömrük rüsumu tətbiq etməyi təklif etdiyini açıqlayıb. O, ABŞ-da istehsal olunan məhsullara bu rüsumun şamil edilməyəcəyini də əlavə edib.

Qeyd edək ki, Tramp administrasiyası dövründə ABŞ-ın Avropa İttifaqı ilə ticarət münasibətləri dəfələrlə gərginliklərlə müşayiət olunub və bu tip təkliflər transatlantik əlaqələrə təzyiq göstərmək üçün tez-tez istifadə olunur.