BAKI, AzerVoice

ABŞ Prezidenti Donald Trampın təşəbbüsü ilə "Qızıl Kart" proqramı yaxın günlərdə istifadəyə veriləcək.

AzerVoice xəbər verir ki, ABŞ-ın ticarət naziri Hovard Lutnik Donald Trampın təşəbbüsü ilə yaradılan “Trump Card” adlı xüsusi rezidensiya proqramının yaxın zamanda ictimaiyyətə təqdim olunacağını açıqlayıb.

Onun sözlərinə görə, proqram çərçivəsində ABŞ-da 5 milyon dollar investisiya edən əcnəbilərə daimi yaşamaq hüququ verilməsi nəzərdə tutulur.

Lutnik bildirib ki, bu məqsədlə yaradılan TrumpCard.gov vebsaytı bir həftə ərzində fəaliyyətə başlayacaq və həmin platforma vasitəsilə ilkin qeydiyyat prosesinə start veriləcək.

Donald Tramp bu təşəbbüsü ilk dəfə fevral ayında açıqlamış və “Qızıl Kart” proqramının xarici vətəndaşlara yaşıl kartın təmin etdiyi hüquqlardan daha geniş imkanlar təqdim edəcəyini bildirmişdi. O, aprel ayında kartın qızılı rəngdə fiziki versiyasını nümayiş etdirərək, “Bu kart 5 milyon dollara sizin ola bilər,” deyə jurnalistlərə təqdim etmişdi.

Kartın üzərində Trampın fotosu və “Trump Card” yazısı yer alır. Proqramdan əldə ediləcək gəlirlə ABŞ-ın dövlət borcunun bir hissəsinin maliyyələşdirilməsi planlaşdırılır.

Bununla belə, ekspertlər bu proqramın hüquqi əsaslarını və Konqresin təsdiqi olmadan icraya verilib-verilə bilməyəcəyini müzakirə edir. ABŞ qanunvericiliyi çərçivəsində belə bir təşəbbüsün nə dərəcədə hüquqi qüvvəyə malik olacağı ilə bağlı hələlik aydınlıq yoxdur.

Qeyd edək ki, ABŞ-da əvvəllər də investisiya əsaslı yaşamaq hüququ verən proqramlar tətbiq olunub. Lakin Trampın "Qızıl Kart" təşəbbüsü həm təqdimat forması, həm də ictimai maraq baxımından fərqlənir