BAKI, AzerVoice
Tehranın Vaşinqtonla növbəti danışıqlarda iştirak edib-etməyəcəyi hələ məlum deyil.
AzerVoice xəbər verir ki, bu barədə İranın xarici işlər naziri Seyid Abbas Araqçi bildirib.
O, eyni zamanda ölkəsinin danışıqların aparılmasından imtina etmədiyini vurğulayıb.
Digər tərəfdən, İranın ali lideri Əli Xamenei bu ABŞ-İran danışıqlarının razılaşma ilə nəticələnəcəyinə şübhə ilə yanaşıb.
“Amerikalılar boş-boş danışmamalıdırlar. Uran zənginləşdirilməsinin dayandırılacağını deyənlər xəyal qursunlar” - deyə, Xamenei vurğulayıb.
Xatırladaq ki, çərşənbə günü Araqçi jurnalistlərə verdiyi açıqlamada ölkəsinin uranı zənginləşdirməkdə israrlı olduğunu bir daha qeyd edib.
“Razılıq əldə olunsa da, olunmasa da, uranı zənginləşdirməyə davam edəcəyik” - deyə, Araqçi bildirib.
O əlavə edib ki, İrana məxsus qanuni haqlardan məhrum etməyə yönəlmiş əlavə tələblər tamamilə qəbuledilməzdir.
“Əvvəllər də bu cür qeyri-məntiqli tələblərə cavab vermişik və bir daha vurğulayıram ki, bu cür radikal bəyanatlar dialoqu irəli aparmayacaq. Lakin əgər qarşı tərəf bizim nüvə proqramımızla bağlı şəffaflıq axtarırsa, biz əməkdaşlığa hazırıq” - deyə, o qeyd edib.
