BAKI, AzerVoice

İranın BMT-dəki səfiri Əmir-Səid İravani, İslam Respublikasının BMT-nin Yəmənə tətbiq etdiyi silah embarqosunu pozduğu ilə bağlı iddiaları tamamilə əsassız adlandırıb.

AzerVoice xəbər verir ki, bu barədə İravani, Nyu-Yorkda keçirilən BMT Təhlükəsizlik Şurasının “Beynəlxalq Əməkdaşlıqla Dəniz Təhlükəsizliyinin Gücləndirilməsi və Qlobal Sabitlik” mövzusunda açıq iclasında çıxışı zamanı bildirib.

Diplomat bəyan edib ki, İran heç vaxt BMT Təhlükəsizlik Şurasının qətnamələrini pozacaq hər hansı fəaliyyətlə məşğul olmayıb. O, həmçinin, İranın Beynəlxalq dəniz hüququna tam riayət etdiyini və dəniz təhlükəsizliyinə töhfə verdiyini vurğulayıb.

İravani bildirib ki, İran Hürmüz boğazı, Bab əl-Məndəb və Hind okeanının şimalında ticarət və neft gəmilərinin təhlükəsiz keçidini təmin etməklə regional və beynəlxalq sabitliyə töhfə verir.

Səfir çıxışında ABŞ tərəfindən tətbiq edilən birtərəfli sanksiyaları tənqid edərək bildirib ki, bu qeyri-qanuni addımlar qanuni ticarət əlaqələrini pozur, İranın neft yükünün qanunsuz müsadirəsinə səbəb olur və BMT Nizamnaməsi ilə ziddiyyət təşkil edir.

İravani dəniz təhlükəsizliyinin siyasi məqsədlərlə manipulyasiya olunmasının qəbuledilməz olduğunu bildirib və bu məsələdə beynəlxalq hüquq, ayrı-seçkiliyə yol verməmə və dövlətlərin suverenliyinə hörmət prinsiplərinin əsas götürülməsinin vacibliyini qeyd edib.

Çıxışının sonunda İravani ABŞ və İsrail nümayəndələrinin İrana qarşı səsləndirdiyi ittihamları qətiyyətlə rədd etdiklərini bildirib. O, bu iddiaların regiondakı reallıqları təhrif etməyə və Qırmızı dənizdəki qeyri-sabitliyin əsas səbəblərindən diqqəti yayındırmağa xidmət etdiyini deyib.

Sonda İravani vurğulayıb ki, bu reallıqlar dezinformasiya ilə ört-basdır edilə bilməz və BMT Təhlükəsizlik Şurası regionda sabitliyi təmin etmək üçün bu əsas səbəbləri nəzərə almalı və beynəlxalq hüququn üstünlüyünü qorumalıdır.