BAKI, AzerVoice
ABŞ administrasiyası, İranın tikinti sektoruna yönəlik olaraq emal olunmamış metalları, qrafit, kömür və sənaye məqsədli proqram təminatı tədarük edənlərə qarşı sanksiyalar tətbiq etmək qərarına gəlib.
AzerVoice xəbər verir ki, bu barədə ABŞ Dövlət Departamentinin yaydığı yazılı açıqlamada bildirilib.
Açıqlamaya görə, İranın tikinti sektoru "İslam İnqilabı Keşikçiləri Korpusu"nun (SEPAH – İran Silahlı Qüvvələrinin elit birləşmələri) birbaşa və ya dolayı nəzarəti altındadır. Nazirlik həmçinin İranın nüvə və hərbi proqramları, eləcə də ballistik raketlərin hazırlanması proqramı çərçivəsində istifadə edilən 10 strateji materialın siyahısını dərc edib.
“İstənilən fiziki və ya hüquqi şəxs – əgər bilə-bilə İranla və ya İrandan kənara emal olunmamış və ya yarı-emal olunmuş metallar, qrafit, kömür və ya inteqrasiya olunmuş sənaye məqsədləri üçün proqram təminatı satırsa, tədarük edirsə və ya ötürürsə – və bu materiallar İranın tikinti sektoru ilə bağlı şəkildə istifadə olunursa, həmin şəxslər mütləq şəkildə sanksiyalara məruz qalacaqlar” - deyə, açıqlamada qeyd olunub.
