BAKI, AzerVoice
ABŞ və Rusiya prezidentlərinin iki saatlıq telefon danışığından sonra Ukrayna müharibəsində atəşkəs üçün yeni danışıqlara start verilir.
AzerVoice xəbər verir ki, ABŞ
Prezidenti Donald Tramp və Rusiya Prezidenti Vladimir Putin
İstanbul Sammitindən sonra telefon danışığı aparıblar.
Tramp, iki saatlıq söhbətin ardında görüşün çox yaxşı keçdiyini və
Rusiya ilə Ukrayna arasında dərhal atəşkəs və müharibənin bitməsi
üçün danışıqlar başlayacağını bildirib.
Trampın bu diplomatik təşəbbüsü öncəsində o, Avropanın əsas liderləri – İtaliya Baş naziri Giorgia Meloni, Böyük Britaniya Baş naziri Keir Starmer, Fransa Prezidenti Emmanuel Makron və Almaniya Kansleri Fridrix Merz ilə məsləhətləşmələr aparıb. Meloni bu danışığı şərh edərək, İtaliyanın Ukraynada ədalətli və davamlı sülhə dəstəyini ifadə edib və qeyd-şərtsiz atəşkəsin vacibliyini vurğulayıb.
Putinlə telefon söhbətini "konstruktiv" adlandıran Tramp, Rusiyanın ABŞ-la genişmiqyaslı ticarətə maraqlı olduğunu bildirib. O, həmçinin Papa XIV Leo-nun təmsil etdiyi Vatikanın danışıqlara ev sahibliyi etməyə hazır olduğunu qeyd edib və proses başlaması üçün mesaj verib.
Rusiya Prezidenti Vladimir Putin isə Soçidə verdiyi bəyanatda Trampla görüşü faydalı hesab etdiyini söyləyib və bildirib ki, Rusiya, Ukrayna ilə sülh razılaşması üçün memorandum üzərində işləməyə hazırdır. Putin həmçinin, münaqişənin köklü səbəblərinin aradan qaldırılmasının Moskva üçün önəmli olduğunu deyib.
Ukrayna Prezidenti Vladimir Zelenski də Tramp ilə gün ərzində iki dəfə telefon danışığı apardığını açıqlayıb. O, Ukraynanın istənilən nəticəverici formatda danışıqlara hazır olduğunu bildirərək, mümkün ev sahibləri kimi Türkiyə, Vatikan və İsveçrənin nəzərdən keçirildiyini vurğulayıb. Bununla belə, o, Rusiyanın “qeyri-real tələblər” irəli sürəcəyi təqdirdə, sanksiya təzyiqinin artırılmasını vacib hesab etdiyini qeyd edib.
Qeyd edək ki, bu danışıqlar Rusiya-Ukrayna müharibəsinin başladığı gündən bəri ilk real atəşkəs təşəbbüsləri arasında sayılır və beynəlxalq ictimaiyyətin diqqət mərkəzindədir.