Təfərrüatlar əlavə olunub (xəbər saat 18:55-də yayımlanıb)
BAKI, AzerVoice
ABŞ Prezidenti Donald Tramp Rusiya Prezidenti Vladimir Putin ilə telefon danışığı aparıb.
AzerVoice-un məlumatına görə, telefon danışığı iki saatdan çox davam edib.
Putin Trampla baş tutan bu telefon danışığını yüksək qiymətləndirib.
"Bir daha vurğulamaq istəyirəm ki, bu telefon danışığı çox konstruktiv oldu və mən bunu yüksək qiymətləndirirəm" – deyə, Putin bildirib.
Rusiya prezidenti, Trampa ABŞ-ın Rusiya və Ukrayna arasında sülh sazişinin bağlanması üçün göstərdiyi səylərə görə təşəkkür etdiyini bildirib.
"Əvvəlcə ABŞ prezidentinə Rusiya ilə Ukrayna arasında mümkün sülh sazişinin bağlanması və danışıqların bərpası ilə bağlı birbaşa müzakirələrin yenidən başladılması üçün ABŞ tərəfindən göstərilən dəstəyə görə təşəkkür etdim. Bu danışıqların, məlum olduğu kimi, hələ 2022-ci ildə Ukrayna tərəfindən dayandırıldığı bəllidir" – deyə, Putin vurğulayıb.
O, həmçinin, qeyd edib ki, Rusiya, Ukrayna ilə gələcək sülh sazişi üzrə memorandum üzərində işləməyə hazırdır və bu sənədə atəşkəs məsələləri ilə yanaşı, münaqişənin həlli prinsipləri də daxil edilə bilər.
“Rusiya, mümkün sülh sazişinə dair bir sıra mövqelərin müəyyənləşdirilməsini nəzərdə tutan memorandum üzrə Ukrayna tərəfi ilə işləməyi təklif edir və buna hazırdır. Bu mövqelərə, məsələn, nizamlama prinsipləri, sülh sazişinin mümkün bağlanma müddətləri və sair daxildir. Əgər müvafiq razılaşmalar əldə olunarsa, müəyyən müddətə atəşkəsin tətbiqi də gündəmdə ola bilər” – deyə, Putin qeyd edib.
Tramp isə, telefon danışığı zamanı Putinlə Rusiyanın Ukrayna məsələsinin sülh yolu ilə həllinin tərəfdarı olduğunu vurğulayıb.
“Tramp da öz növbəsində qeyd etdi ki, Rusiya da Ukrayna böhranının sülh yolu ilə həllini dəstəkləyir və bizim sadəcə olaraq sülhə aparan ən səmərəli yolları müəyyənləşdirməyimiz lazımdır” – deyə, Putin bildirib.
Telefon danışığının təfərrüatları barədə daha ətraflı məlumatı Rusiya prezidentinin mətbuat katibi Dmitri Peskov və prezidentin köməkçisi Yuri Uşakov təqdim edəcək.
Qeyd edək ki, iki lider arasında əvvəlki telefon danışığı martın 18-də baş tutub. Danışıqların əsas mövzuları Ukrayna və Yaxın Şərqdəki vəziyyətin tənzimlənməsi, eləcə də ikitərəfli münasibətlər olub.
