BAKI, AzerVoice

“Qəzza zolağının bütün ərazilərinə nəzarəti ələ keçirəcəyik.”

AzerVoice xəbər verir ki, İsrailin baş naziri Benyamin Netanyahu videomüraciətində Qəzza zolağının hər bir nöqtəsinə nəzarəti tam şəkildə təmin edəcəklərini bildirib.

Netanyahu döyüşlərin intensiv şəkildə davam etdiyini vurğulayaraq, “Qəzza zolağının bütün ərazilərinə nəzarəti ələ keçirəcəyik. Biz təslim olmayacağıq.” - deyə bildirib.

Yardımların bölgəyə buraxılması ilə bağlı qərarı müdafiə edən Netanyahu, bu addımın diplomatik zərurət olduğunu qeyd edib. “Əgər bunu etməsəydik, ABŞ-ın dəstəyini itirərdik. Diplomatik və praktiki səbəblərlə insanların ac qalmasına icazə verə bilmərik.” - deyə o bildirib.

“Müharibədə sizə lazım olan dəstəyi verəcəyik, amma Qəzzada aclıq səhnələri görmək istəmirik”, – deyə Netanyahu həmçinin bəzi ABŞ senatorlarının ona yardım məsələsində təzyiq etdiyini bildirib:.

Qeyd edək ki, İsrail mart ayından bəri humanitar yardımın Qəzzaya keçidinə əngəl yaradırdı. Lakin beynəlxalq təzyiqlərin artmasından sonra blokadanı qismən yumşaltmaq qərarı alıb. Rəsmi açıqlamada bu qərarın İsrail ordusunun tövsiyəsi əsasında verildiyi bildirilib.

İsrailin maliyyə naziri Bezalel Smotrich də yardımın keçidinə icazəni müdafiə edərək, bunun beynəlxalq dəstəyi qorumaq üçün doğru addım olduğunu deyib.