BAKI, AzerVoice

Hindistan Kosmik Tədqiqatlar Təşkilatı (ISRO), mühərriklərdən birində yaranan nasazlıq səbəbilə tədqiqat peykini kosmosa göndərmək üçün nəzərdə tutulan raket buraxılışını həyata keçirə bilməyib.

AzerVoice xəbər verir ki, bu barədə təşkilatın rəhbəri V. Narayanan keçirdiyi brifinqdə məlumat verib.

"Bu gün Şriharikota kosmodromundan 101-ci buraxılışımız olan PSLV-C61 EOS-09 missiyasını həyata keçirməyi planlaşdırırdıq. PSLV dörd mərhələli bir raketdir və ikinci mərhələyə qədər hər şey normal idi. Üçüncü mərhələnin mühərriki uğurla işə düşdü, lakin bu mərhələdə işləmə zamanı nasazlıq müşahidə olundu və missiyanın yerinə yetirilməsi mümkün olmadı" – deyə, Narayanan bildirib.

Onun sözlərinə görə, mühərrikin gövdəsində təzyiqin düşməsi qeydə alınıb.

Məlumat üçün bildirək ki, EOS-09 Yer müşahidə peykidir. O, istənilən hava şəraitində, gündüz və gecə görüntülər əldə edə bilir. Bu görüntülər kənd təsərrüfatı, meşə təsərrüfatı, şəhər planlaşdırması, milli təhlükəsizlik və təbii fəlakətlərin nəticələrinin aradan qaldırılması üçün mühüm əhəmiyyət daşıyır.