BAKI, AzerVoice
ABŞ-ın sabiq prezidenti Donald Tramp Yaxın Şərq turu çərçivəsində Səudiyyə Ərəbistanı və Qətərə etdiyi səfərlərdə trilyonlarla dollar dəyərində investisiya topladıqlarını bildirib.
AzerVoice xəbər verir ki, Tramp, Birləşmiş Ərəb Əmirliklərinə (BƏƏ) səfər etməzdən əvvəl prezident təyyarəsi "Air Force One"da jurnalistlərə verdiyi açıqlamada bildirib.
Yaxın Şərq səfərinin ilk dayanacaqları olan Səudiyyə Ərəbistanı və Qətərdə çox mühüm razılaşmalar imzaladıqlarını deyib.
“Ölkəmiz üçün trilyonlarla dollar dəyərində investisiya əldə etdik. Səudiyyə Ərəbistanı və Qətərdə çox yaxşı dostlarımız var,” – deyə Tramp vurğulayıb.
O, Qətər Hava Yolları ilə ABŞ-ın təyyarə istehsalçısı "Boeing" arasında 160 təyyarənin alınmasını nəzərdə tutan 200 milyard dollarlıq müqaviləyə də toxunaraq, “Düşünürəm ki, bu aviasiya tarixində verilmiş ən böyük sifarişdir,” – deyə bildirib.
Tramp, həmçinin Türkiyənin ev sahibliyi ilə İstanbulda keçirilməsi planlaşdırılan Rusiya–Ukrayna sülh danışıqlarına da münasibət bildirib. Moskvanın danışıqlara göndərəcəyi nümayəndə heyəti barədə məlumatsız olduğunu deyən Tramp, “Putin və mən görüşənədək heç nə olmayacaq,” – ifadəsini işlədib.
Qeyd edək ki, Donald Tramp 2025-ci il mayın 12-də Yaxın Şərq turu çərçivəsində Səudiyyə Ərəbistanı və Qətərə səfər edib. Mayın 13-də Riyadda Vəliəhd Məhəmməd bin Salmanla, mayın 14-də isə Dohada Əmir Tamim bin Həməd Al Tani ilə görüşüb.
