BAKI, AzerVoice

ABŞ və İsrail arasında diplomatik gərginlik artır- Tramp İsrail lobbilərinə bağlı şəxsləri Ağ Evdən uzaqlaşdırır.

AzerVoice xəbər verir ki, ABŞ prezidenti Donald Trampın İsrailin baş naziri Benyamin Netanyahu ilə münasibətlərinin soyuması fonunda Vaşinqton-Təl-Əviv xəttində gərginlik pik həddə çatıb.

İsrail mediasının məlumatına görə, Tramp son həftələrdə Ağ Evdə İsrail lobbiləri ilə əlaqədə olan bir sıra vəzifəli şəxsləri və müşavirləri vəzifəsindən azad edib.

Məlumata görə, Tramp Netanyahu ilə bir müddətdir görüş keçirmir. İsrailin təhlükəsizlik kabinetində baş nazir Netanyahunun "gərəksə, ABŞ-dan təhlükəsizlik yardımlarını qəbul etməyə bilərik" bəyanatı isə iki ölkə arasında fikir ayrılıqlarının nə qədər dərin olduğunu göstərir.

Bununla yanaşı, Trampın hazırda davam edən Yaxın Şərq səfərində İsraildə dayanmayaraq yalnız Körfəz ölkələrini ziyarət etməsi də bu diplomatik soyuqluğun əlaməti kimi qiymətləndirilir. ABŞ və HƏMAS arasında İsrailin iştirakı olmadan atəşkəs müzakirələrinin aparılması da Təl-Əvivin narahatlığına səbəb olub.

Digər tərəfdən, Ağ Evin yaxın günlərdə Qəzza zolağına genişmiqyaslı humanitar yardım göndəriləcəyini elan etməsi gözlənilir. ABŞ administrasiyası HƏMAS-ın danışıqlarda “müsbət jest” olaraq ABŞ-İsrailli girov Edan Aleksandrın azad edilməsini dəstəkləyib.

Lakin bölgədə gərginlik davam edir. İsrail ordusunun Qəzzada məktəb və məscidlərə hücumu nəticəsində 18 fələstinli mülki şəxsin həyatını itirdiyi bildirilir. Bu hadisə beynəlxalq ictimaiyyətdə ciddi narahatlıq doğurub.