BAKI, AzerVoice

Məsqətdə keçirilən İran–ABŞ danışıqlarında İranın nüvə proqramı üzrə razılaşma əldə olunması üçün ümumi istəyi əks etdirən faydalı və orijinal ideyalar müzakirə olunub.

AzerVoice xəbər verir ki, bu barədə Omanın xarici işlər naziri Bədr əl-Busaidi bildirib.

“Bu gün Məsqətdə İran və ABŞ arasında növbəti danışıqlar raundunu başa vurduq. Müzakirələr zamanı dəyərli və yaradıcı ideyalar səsləndirildi ki, bu da layiqli bir razılaşmaya çatmaq üçün ortaq iradəni göstərir. Beşinci raund hər iki tərəf öz liderləri ilə məsləhətləşdikdən sonra baş tutacaq” – deyə, nazir vurğulayıb.

Qeyd edək ki, bugün Omanın paytaxtı Məsqətdə İranın nüvə proqramı ilə bağlı böhranın həlli üzrə ABŞ və Tehran arasında danışıqların dördüncü mərhələsi başa çatıb. Bu vaxta qədər ABŞ və İran Omanın vasitəçiliyi ilə üç danışıqlar raundu keçiriblər. Birinci raund aprelin 12-də Məsqətdə, ikinci aprelin 19-da Romada, üçüncü isə aprelin 26-da yenidən Məsqətdə baş tutub. İran nümayəndə heyətinə Xarici İşlər Naziri Seyid Abbas Araqçi rəhbərlik edir, ABŞ tərəfini isə Donald Trampın xüsusi nümayəndəsi Stiven Uitkoff təmsil edir.