BAKI, AzerVoice
İsrailin Qəzzada əməliyyatları əsirləri qurban vermək anlamına gəlir.
AzerVoice xəbər verir ki, HƏMAS
Hərəkatı İsrailin Qəzza zolağında hərbi əməliyyatları
genişləndirməsini “əsirləri qurban vermək qərarı” kimi
qiymətləndirib.
Hərəkat çərşənbə axşamı yaydığı bəyanatda bildirib ki, bölgədə
aclıq və mühasirə davam etdiyi halda atəşkəs danışıqlarının heç bir
mənası yoxdur.
HƏMAS Ərəb və İslam ölkələrini, eləcə də beynəlxalq ictimaiyyəti və BMT-ni İsraili dayandırmağa, fələstinlilərə qarşı törədilən cinayətlərə son qoymağa və məsul şəxsləri beynəlxalq ədalət qarşısında cavab verməyə çağırıb.
Bəyanatda İsrail ordusunun uzun müddətdir həyata keçirdiyi planların uğursuzluqla nəticələndiyi vurğulanaraq, bu siyasətin davam etdirilməsinin yeni faciələrə yol açacağı bildirilib. Hazırda HƏMAS-ın əlində təxminən 20-dən çox israilli əsirin olduğu ehtimal edilir.
BMT-nin Fələstinli Qaçqınlara Yardım Agentliyi (UNRWA) bu gün yayımladığı açıqlamada bölgədə iki aydan çoxdur davam edən mühasirəni “kollektiv cəza” adlandıraraq, İsraili Qəzzaya yardım axınına icazə verməyə çağırıb.
Agentliyin rəhbəri Filipp Lazzarini ötən həftə bildirib ki, ərzaq, dərman və yanacaq çatışmazlığı səbəbindən hər gün daha çox qadın və uşaq həyatını itirir. Hazırda bölgədə çörək bişirmək üçün un, xəstəxanalar üçün dərman və enerji mənbələri tükənmək üzrədir.
HƏMAS Siyasi Bürosunun üzvü Bəsim Nəim Fransız mətbuatına açıqlamasında bildirib ki, bu şərtlər altında atəşkəs və ya əsir mübadiləsi təklifləri mənasızdır. O, beynəlxalq ictimaiyyəti Qəzzada baş verənləri dayandırmaq üçün Netanyahunun hökumətinə təzyiq göstərməyə çağırıb.
İsrail ordusunun sözçüsü Efi Deyfrin isə bildirib ki, “Gideon Arabaları” adlanan yeni əməliyyat mərhələsi həm əsirlərin azad edilməsinə, həm də HƏMAS-ın hərbi və siyasi strukturunun dağıdılmasına yönəlib. “Bu iki məqsəd bir-birinə bağlıdır,” – deyə o qeyd edib.
Qeyd edək ki, İsrail və HƏMAS arasında son atəşkəs martın 18-də birtərəfli şəkildə ləğv olunub və bu tarixdən bəri bölgəyə humanitar yardımın daxil olmasına tam qadağa tətbiq edilib. Münaqişənin başlanğıcı isə 2023-cü il oktyabrın 7-də HƏMAS-ın İsrailin cənubuna hücumu ilə qoyulmuşdu ki, bu zaman 1200 nəfər ölmüş, 250-dən çox şəxs girov götürülmüşdü.
