BAKI, AzerVoice
ABŞ Prezidenti Donald Tramp bəyan edib ki, lazım gələrsə, "TikTok" platformasının ABŞ-da bloklanma müddətini yenidən uzatmağa hazırdır.
AzerVoice xəbər verir ki, bu haqda o, "NBC News"a verdiyi müsahibədə deyib.
"Əgər təxirəsalma lazım olacaqsa, mən bunu etmək istərdim. Ola bilsin ki, buna ehtiyac olmayacaq" - deyə, Tramp bildirib.
ABŞ prezidenti əlavə edib ki, TikTok-un ABŞ-dakı aktivlərinə dair bir razılaşma görmək istərdi. O, bu sosial şəbəkəyə isti münasibət bəslədiyini, lakin onun qorunmalı olduğunu bildirib.
Bundan əvvəl Tramp bəyan etmişdi ki, TikTok-un satışı ilə bağlı razılaşma ABŞ və Çin arasındakı ticarət gərginliyi həll olunana qədər təxirə salınacaq.
Xatırladaq ki, yanvarın 20-də keçirilmiş andiçmə mərasimindən sonra Tramp TikTok-un ölkədə bloklanmasını aprelin 5-ə qədər təxirə salan fərman imzalayıb. O, həmçinin bildirib ki, Birləşmiş Ştatlar TikTok-un yarısına sahib olmaq hüququna malik olmalıdır, lakin bu fikrinin konkret olaraq nə anlama gəldiyini izah etməyib. 4 aprel tarixində isə Tramp yeni fərmanla platformanın fəaliyyət müddətini ölkədə daha 75 gün uzadıb.
