BAKI, AzerVoice
İran Xarici İşlər Nazirliyi ABŞ-la nüvə proqramı üzrə aparılan danışıqların dördüncü mərhələsinin təxirə salındığını təsdiqləyib.
AzerVoice xəbər verir ki, bu barədə İran Xarici İşlər Nazirliyinin yaydığı rəsmi bəyanatda qeyd olunub.
“Danışıqların tarixində dəyişiklik Oman xarici işlər naziri Bədr əl-Busaidinin təklifi əsasında edilib. Növbəti tarixlə bağlı məlumat daha sonra veriləcək” - deyə, Nazirliyin bəyanatında bildirilib.
Xatırladaq ki, Bədr əl-Busaidi daha əvvəl ABŞ və İran arasında mayın 3-də keçirilməsi planlaşdırılan danışıqların növbəti mərhələsinin logistik səbəblərə görə təxirə salındığını bildirmişdi.
Həmçinin xatırladaq ki, aprelin 26-da Omanın vasitəçiliyi ilə Məsqətdə ABŞ və İran arasında İranın nüvə proqramı üzrə böhranın həllinə dair dolayı danışıqların üçüncü mərhələsi baş tutub. Danışıqların birinci mərhələsi aprelin 12-də Məsqətdə, ikinci mərhələsi isə aprelin 19-da Romada keçirilmişdi. Məlumata görə, mayın 3-də keçirilməsi planlaşdırılan danışıqlarda İran nümayəndə heyətinə xarici işlər naziri Seyid Abbas Araqçi, ABŞ nümayəndə heyətinə isə prezidentin xüsusi nümayəndəsi Stiven Uitkoff rəhbərlik etməli idi.
