BAKI, AzerVoice
İspaniyada elektrik enerjisinin kəsilməsi nəticəsində azı beş nəfər ölüb.
AzerVoice xəbər verir ki, bu barədə El Pais qəzeti məlumat verib.
Məlumata görə, İspaniyanın Qalisiya muxtar icmasına daxil olan Orense əyalətində bir ailənin üç üzvü, ehtimal ki, generator cihazından sızan karbonmonoksid qazını (zəhərli qazı) udduqdan sonra ölüb. Valensiya muxtar icmasında isə bir qadın, elektrik cihazının verdiyi oksigen tükəndiyi üçün həyatını itirib. Bundan əlavə, Madriddə bir qadın, səbəbinin şam ola biləcəyi ehtimal edilən yanğın nəticəsində ölüb.
Xatırladaq ki, dünən günorta saatlarında İspaniyada elektrik enerjisi kəsilmişdi. Nəticədə svetoforlar işləməyib, insanlar qatarlarda köməksiz vəziyyətdə qalıb, ictimai nəqliyyat və xəstəxanaların fəaliyyəti pozulub. Eyni zamanda mobil rabitə və internet də işləməyib. Yalnız gecə saatlarında enerji təchizatının tədricən bərpasına başlanılıb.
Hökumət, bu hadisənin səbəbini araşdırmağa başlayıb və ilk ehtimal olaraq kiberhücum və texniki nasazlıq kimi bir neçə fərziyyə irəli sürülüb.
Əlavə edək ki, baş vermiş nasazlıq Portuqaliyanı da təsirləndirib.
