BAKI,
AzerVoice
Qəzzada aclıq dərinləşir - UNRWA yardımların tükəndiyini
bildirib.
AzerVoice xəbər verir ki, BMT-nin Yaxın Şərqdəki Fələstinli Qaçqınlara Yardım və İşlər üzrə Agentliyi (UNRWA) Qəzza zolağında humanitar yardımın tükəndiyini və aclığın gündən-günə daha da dərinləşdiyini açıqlayıb.
UNRWA-nın X platformasında yayımladığı paylaşımda, ehtiyacı olan insanlara əsas yardım vasitələrinin çatdırıla bilmədiyi və aclığın daha da yayıldığı vurğulanıb. Agentlik bildirib ki, təxminən 3000 yardım maşını Qəzzaya giriş üçün gözləyir və yardımların qarşısındakı əsas maneə sərhəd qapılarının bağlı qalmasıdır.
Qeyd edək ki, martın 2-dən etibarən İsrail, HƏMAS ilə əldə olunan atəşkəsin birinci mərhələsinin başa çatmasının ardından Qəzzaya humanitar yardımın daxil olmasını dayandırıb. İsrailin 7 oktyabr 2023-cü ildən bəri həyata keçirdiyi hücumlar nəticəsində bölgədə 2 milyona yaxın insan didərgin düşüb, mülki infrastruktur və xəstəxanalar dağıdılıb. Sərhədlərin bağlı saxlanılması, su və elektrik təchizatının kəsilməsi isə Qəzzadakı fələstinlilərin vəziyyətini daha da ağırlaşdırıb.
Atəşkəsin qüvvədən düşdüyü 18 mart tarixindən bu yana İsrailin yenidən başlatdığı hücumlarda 2273 fələstinli həyatını itirib, 5864 nəfər yaralanıb. Ümumilikdə isə 7 oktybr 2023-cü ildən bu günə qədər 52 min 365 fələstinli ölüb, 117 min 905 nəfər isə yaralanıb.
