BAKI, AzerVoice
Harvard Universitetində irqi ayrı-seçkilik iddiaları ilə bağlı federal səviyyədə araşdırma başlanılıb.
AzerVoice xəbər verir ki, ABŞ Təhsil
Departamenti və Səhiyyə və İnsan Xidmətləri Departamenti birgə
bəyanatla Harvard Universitetinin hüquq jurnalı Harvard Law
Review-un məqalə seçimində irqi meyarların əsas götürüldüyü
iddiaları ilə bağlı araşdırma başladığını açıqlayıb.
İstintaq çərçivəsində jurnalın maliyyə əlaqələri, üzvlük meyarları,
məqalə qəbul siyasəti və audit prosedurları araşdırılacaq. Bu
proses, federal qrant alan qurumların irqə görə ayrı-seçkilik
etməsini qadağan edən 1964-cü il Mülki Hüquqlar Aktının VI
Başlığına əsaslanır.
Qeyd edək ki, Tramp administrasiyası Harvard Universitetinin
kampusda Fələstinə dəstək aksiyalarına və inklüzivlik proqramlarına
görə tənqid edib və universitetə ayrılan 2,2 milyard dollarlıq
maliyyənin və 60 milyon dollarlıq müqavilə vəsaitinin
dondurulmasına qərar verib.
Harvard isə bu qərarı qanunsuz hesab edərək məhkəməyə müraciət
edib.
