BAKI, AzerVoice
Qrenlandiyanın Baş naziri ABŞ-ın bəyanatlarını “hörmətsizlik” adlandırıb.
AzerVoice xəbər verir ki, Qrenlandiyanın
Baş naziri Jens-Frederik Nielsen ABŞ-ın ölkəsi ilə bağlı son
şərhlərini sərt tənqid edərək, bunları “hörmətsizlik”
adlandırıb.
O, Qrenlandiyanın heç vaxt satın alına biləcək bir mülk
olmayacağını vurğulayıb.
Danimarkaya səfəri zamanı keçirdiyi mətbuat konfransında danışan Nielsen bildirib ki, ABŞ Qrenlandiya ilə bağlı məsələlərdə Danimarka ilə əməkdaşlıq çərçivəsində hərəkət etməlidir. “Qrenlandiya heç vaxt hər kəsin ala biləcəyi bir mülk olmayacaq” – deyə o əlavə edib. Baş nazir eyni zamanda Vaşinqtonla dialoqa açıq olduqlarını da bildirib.
Qeyd edək ki, ABŞ prezidenti Donald Tramp vəzifəyə qayıtdıqdan sonra Qrenlandiyanın ABŞ-ın nəzarətinə keçməsinin vacibliyini dəfələrlə vurğulayıb. Tramp, Çin və Rusiya gəmilərinin bölgədə fəallığının artmasından narahat olduğunu və bu məsələnin idarəsini Danimarka və ya başqa ölkəyə etibar etməyəcəyini bildirmişdi.
Digər tərəfdən, ABŞ vitse-prezidenti JD Vance həyat yoldaşı Uşa Vens, Enerji naziri Kris Rayt və Milli Təhlükəsizlik müşaviri Mayk Vals ilə birlikdə Qrenlandiyaya səfər edərək, Danimarkanın adanın təhlükəsizliyinə kifayət qədər sərmayə qoymadığını iddia edib. Vance, "Qrenlandiyada daha çox mövqeyə sahib olmalıyıq" deyərək, adanın gələcəkdə ABŞ üçün strateji əhəmiyyətinin daha da artacağını bildirib. O həmçinin Qrenlandiya xalqının hərbi müdaxilə olmadan ABŞ-ın adaya nəzarət etmək istəyini dəstəkləyəcəyinə inandığını qeyd edib.
