BAKI, AzerVoice
Çinin müxtəlif sahələrdə – neft-kimya sənayesindən suvenir istehsalına qədər fəaliyyət göstərən istehsalçıları ABŞ ilə Çin arasında gərginləşən ticarət müharibəsinin nəticələrindən yayınmaq üçün ABŞ-də müəssisələr açmağa başlayıblar.
AzerVoice xəbər verir ki, bu haqda məlumatı "South China Morning Post" qəzeti verib.
Məlumata görə, Çin şirkətlərinə ABŞ-da istehsal sahələrini lokallaşdırmağa kömək edən konsaltinq şirkətinin rəhbəri Çju Nin bildirib ki, son dörd ay ərzində ən azı 100 müraciət alıb və bu rəqəm keçən il edilən bütün müraciətlərin ümumi sayına bərabərdir.
"Sifarişlərimizin təxminən 95%-i ABŞ bazarına aiddir. Bu elə bir bazardır ki, itirə bilmərik" - deyə, Şərqi Çində hədiyyə istehsalı ilə məşğul olan sahibkar Rayan Çjou qeyd edib.
Rayan Çjou, hazırda Texas ştatının Dallas şəhərində yeni zavod açmağa çalışır. Çjou bildirib ki, oradakı əmək qanunları Çinə nisbətən çox daha sərtdir və ABŞ-də yalnız minimal əl əməyinə ehtiyac duyan məhsullar istehsal etməyi planlaşdırır. O qeyd edib ki, ABŞ-dəki yeni zavodda istehsal prosesi cəmi bir-iki mərhələdən ibarət olacaq, halbuki Çində bir məhsul 8-10 mərhələdən keçirdi. Amerikada bunu həyata keçirmək mümkün deyil.
"Amma əminik ki, dünya bazarında ABŞ dolları hökmranlığını qoruduğu müddətcə, Amerika dünyanın ən böyük istehlak bazarı olaraq qalacaq" - deyə, o əlavə edib.
Hazırkı şəraitdə istehsalın köçürülməsi məntiqlidir. Şenjen şəhərində elektron komponentlər istehsalı ilə məşğul olan şirkətin rəhbəri Leo Li bu ayın əvvəlində Nevada ştatında yeni zavod açıb. Zavod əsasən təchizat zənciri qısa olan və az əmək qüvvəsi tələb edən sensor modulların yığılması üçün nəzərdə tutulub. Ancaq Leo Li hesab edir ki, istehsalın köçürülməsi xərclərə səbəb olacaq.
"Bəli, xərclərim artacaq, amma bu, 145 faizlik gömrük rüsumları qədər ağır olmayacaq. Məqsədimiz mövcud sifariş həcmini qorumaqdır" – deyə, o bildirib.
Pekin şəhərində yerləşən "Chem1" konsaltinq şirkətinin qurucusu Ye İnminin sözlərinə görə, ABŞ-də zavodlar tikmək Çin neft-kimya şirkətləri üçün xüsusilə məntiqli addımdır. Əvvəllər bu şirkətlər ABŞ-dan xammal idxal edib, emaldan sonra hazır məhsulu Amerikaya geri göndərirdilər. Lakin indi bu iş modeli şirkətləri ikiqat yüksək rüsumlarla üz-üzə qoyur.
"Neft-kimya sənayesində, ümumi xərclərin 80-90 faizini xammal təşkil etdiyindən, hətta 10 faizlik tarif belə ciddi təsir göstərir" - deyə, o qeyd edib.
Xatırladaq ki, aprelin 2-də ABŞ Prezidenti Donald Tramp 185 ölkə və əraziyə qarşı yeni gömrük rüsumlarının tətbiq olunduğunu elan edib. Ümumi 10 faizlik tariflər aprelin 5-də qüvvəyə minib, fərdi tariflər isə aprelin 9-da tətbiq edilib. Eyni zamanda Tramp aprelin 9-da bəzi ölkə və ərazilərə qarşı qarşılıqlı prinsip əsasında tətbiq olunmuş əlavə gömrük rüsumlarının 90 gün müddətinə təxirə salındığını bildirib. Ağ Ev bu qərarın ticarət danışıqları aparıldığı üçün verildiyini və bu müddətdə 10 faizlik ümumi tarifin qüvvədə qalacağını bildirib.
Əlavə edək ki, hazırda ABŞ-nin Çin mallarına tətbiq etdiyi ümumi gömrük rüsumları 145 faizə çatıb. Çin isə cavab olaraq aprelin 12-dən etibarən ABŞ məhsullarına tətbiq olunan tarifləri 125 faizə yüksəldib.
